Veterinærinstituttet utnemnd som WOAH-referanselaboratorium for krepsepest
Veterinærinstituttet er offisielt utnemnd som WOAHs referanselaboratorium for krepsepest (Aphanomyces astaci).
Utnemninga er ei anerkjenning av den langvarige innsatsen til instituttet innan forsking, diagnostikk og overvaking av krepsepest, ein dødeleg sjukdom hos ferskvasskreps som blir forårsaka av eggsporesoppen Aphanomyces astaci. Veterinærinstituttet har arbeidd med sjukdommen sidan det første utbrotet i Noreg i 1971, og fungerer i dag som nasjonalt referanselaboratorium for krepsdyrsjukdommar.
Seniorforskar David A. Strand er utnemnd som WOAHs referanseekspert. Han leier det nasjonale overvakingsprogrammet for Aphanomyces astaci, som nyttar miljø-DNA for å påvise krepsepestsmitte i ramma vatn og vassdrag. Miljø-DNA basert overvaking har erstatta tidlege overvaking basert på burforsøk, der edelkreps blei sett ut i bur for å overvake sjukdommen. Overvakingsprogrammet blir gjennomført årleg og er eit viktig verktøy for å verne sårbare edelkrepsebestandar.
Veterinærinstituttet har hatt ei sentral rolle i utviklinga av molekylære metodar for påvising av krepsepest, inkludert qPCR-baserte analysar som er teke i bruk internasjonalt og innarbeidde i WOAHs standardar og miljø-DNA overvaking. Instituttet samarbeider òg tett med leiande forskingsmiljø i Europa og globalt for å forbetre diagnostikk og handtering av sjukdommen.
Som WOAH-referanselaboratorium vil Veterinærinstituttet bidra med vitskapleg og teknisk støtte til medlemsland, inkludert diagnostikk, opplæring og fagleg rådgiving knytt til krepsepest.
Utnemninga understrekar Veterinærinstituttets arbeid med å verne akvatisk biodiversitet og styrkje internasjonalt samarbeid innan dyrehelse.
