I ny rapport «The surveillance programme for Echinococcus multilocularis in rei foxes» (Vulpes vulpes) in Norway 2024», kjem det fram at 537 avføringsprøvar frå raudrev og fire avføringsprøvar frå ulv blei undersøkte for førekomst av revens dvergbendelmorm. Parasitten blei ikkje påvist i nokon av desse prøvane. Totalt har det sidan overvakingsprogrammet blei starta i 2002 blitt undersøkt meir enn 9182 prøvar frå raudrev.
Veterinærinstituttet gjennomfører det nasjonale overvakingsprogrammet Echinococcus multilocularis hos raudrev på oppdrag frå Mattilsynet. Formålet er å dokumentere fristatus for denne parasitten i Fastlands-Noreg. Med bakgrunn i Noregs fristatus krev norsk regelverk at hundar som reiser inn til Noreg frå endemiske område, skal behandlast mot denne parasitten for å unngå at han blir innført via hund. Parasitten kan forårsake alvorleg sjukdom hos menneske.
Bakgrunn
Echinococcus multilocularis er endemisk over store delar av den nordlege halvkula, inkludert austre og sentrale delar av Europa. Parasitten blei for første gong påvist på Svalbard og i Danmark i 1999 og i Sverige i 2011. Spreiing av parasitten til nye område kan gå føre seg både via ville hundedyr (i Noreg primært raudrev og ulv), infiserte smågnagarar i transportar, eller via hundar som blir importerte frå område der smitten finst.