.jpg)
Soppinfeksjonar kan ramma både menneske, dyr og plantar – og med eit våtare og varmare klima i vente, aukar risikoen for at resistente soppar spreier seg. Kvart år døyr over 1,5 millionar menneske av soppinfeksjonar – mange av dei grunna resistens mot azoler.
Prosjektet NavAzole, leia av seniorforskar Ida Skaar ved Veterinærinstituttet, undersøker korleis den vanlege soppen Aspergillus fumigatus utviklar resistens mot azoler – ei gruppe soppmiddel som blir brukt breitt i medisin, landbruk og industri. Verdas helseorganisasjon (WHO) har peika ut denne soppen som ein potensiell helsetrussel, særleg for personar med svekt immunforsvar.
– Me må forstå kvar og korleis resistens oppstår, og korleis den spreier seg, seier Skaar. – Det krev samarbeid på tvers av sektorar, og eit tydeleg Éin helse-perspektiv.
Azolresistens er eit døme på korleis helseutfordringar ikkje kjenner grenser mellom menneske, dyr og miljø. Difor må løysingar utviklast i fellesskap – med forsking, overvaking og ansvarleg bruk av soppmiddel som viktige verktøy.