Thea Blystad Klem blir del av leiargruppa ved instituttet og vil ha overordna ansvar for avdeling for dyrehelse, dyrevelferd og mattryggleik som driv med forsking, diagnostikk og rådgiving knytt til sjukdommar og helsetilstandar hos norske dyrebestandar. Ein viktig del av arbeidet er å sikre godt samarbeid med forvaltning, produksjonsnæringar og andre samfunnsaktørar i Noreg.
Klem jobba òg ved Veterinærinstituttet frå 2018 til 2022, då som forskar, fagansvarleg for drøvtyggjarar og som seksjonsleiar. I 2022 blei ho tilsett ved NMBU Veterinærhøgskolen som leiar for Institutt for parakliniske fag. Ho er utdanna veterinær og har ein doktorgrad innan luftvegsinfeksjonar hos storfe. Klem trekkjer fram korleis Veterinærinstituttets arbeid innan dyrehelse, dyrevelferd og mattryggleik ligg i kjernen av samfunnsoppdraget til instituttet og korleis Veterinærinstituttet skal vere leiande kunnskapsleverandør og bidra til beredskapen det norske samfunnet treng no som verda endrar seg i stadig raskare tempo.
– Eg brenn for å vidareutvikle dette fagområdet og å gjere det i tett samarbeid med kollegaer, forvaltning, næring og andre. For meg handlar det om å styrkje heilskapen gjennom betre utnytting av data, meir tverrfaglegheit, smartare samhandling og ein beredskap som er robust nok til å møte både forventa og uventa hendingar. Eg gler meg til å bidra til utviklinga saman med dei dyktige fagfolka ved instituttet og dei mange samarbeidspartnarane våre, seier Klem.
Administrerande direktør ved Veterinærinstituttet Gun Peggy Strømstad Knudsen ser fram til å ha den nye avdelingsdirektøren med på laget.
– Theas breie fagkompetanse og erfaring med tverrfagleg samarbeid vil vere styrkjande i arbeidet vårt med å møte framtidas utfordringar innan dyrehelse og beredskap. Thea kjenner allereie Veterinærinstituttet og samfunnsoppdraget vårt godt, og blir derfor ein god leiar å ha med i arbeidet med å utvikle Veterinærinstituttet vidare, seier Knudsen.
