Markerer 20 år med samarbeid om fiskehelse
TriNation markerer 20-årsjubileet sitt i Belfast 16. og 17. april. Dette initiativet blei etablert av fagmiljø frå Noreg, Irland og Skottland for erfaringsutveksling om helseutfordringar hos laksefisk.
Då TriNation blei etablert, var det primært med tanke på erfaringsutveksling om pankreassjukdom (PD) og hjartelidingar, men også biotryggleik og produksjonssjukdommar har vore viktige tema gjennom åra.
Viktig plattform for dialog
TriNation samlar forskingsmiljø, forvaltning og oppdrettsnæring frå Noreg, Irland og Skottland for kunnskapsdeling og forskingssamarbeid for å få bukt med fiskesjukdommar. Første møte i TriNation var i 2005, og har sidan vore fråhald omtrent kvart anna år. Sidan det ikkje var møte i 2025, er jubileet eitt år “forseinka”.
-TriNation har blitt ei viktig plattform for dialog om felles fiskehelseutfordringar i Nord-Atlanteren gjennom ein kombinasjon av vitskapleg kunnskap, praktiske erfaringar og tiltak i oppdrettsnæringa, seier seniorforskar Sonal Patel ved Veterinærinstituttet, som er sekretær med hovudansvar for organiseringa av møta og er styremedlem i TriNation.
Ekspertar frå fleire land
FHF (Forskingsfinansieringa til fiskeri- og havbruksnæringa) finansierer sekretariatet. Seminara tiltrekkjer seg 90–130 deltakarar, inkludert internasjonale ekspertar utover vertslanda. I år deltek ekspertar frå 11 land som Storbritannia, Færøyane, Island, Danmark, Belgia, Frankrike, Spania og Canada, i tillegg frå vertslanda. Ekspertane skal mellom anna halde presentasjonar om hjartesjukdommar og pågåande innovasjon for å løyse utfordringar for betre fiskehelse i deira land.
Bidrege til auka kunnskap
Patel meiner at Trination-samarbeidet har bidrege til å auka kunnskap om sjukdomsspreiing og overvakingsstrategiar for å forbetre biotryggleiken i havbruksnæringa, inkludert konkrete tiltak for PD, CMS og HSMI. Det har vore ein vesentleg framgang i tilbodet av analyseverktøy for heilskapleg helseovervaking.
Dei fleste presentasjonar frå møta blir gjorde tilgjengelege for alle gjennom trination.org i etterkant av møta. Oppsummering av hovudfunn og diskusjonar på møta blir òg publisert i ein populærvitskapleg artikkel både på norsk og engelsk i etterkant.
-På vegner av styret rettar eg stor takk til alle sponsorane våre som har støtta oss gjennom 20 år, slik at vi har klart å halde desse møta utan registreringsavgift for deltakarane. Det blei innført ei lita registreringsavgift i år, men målet er å halde det på eit nivå som er overkommeleg for dei fleste for å delta, seier Patel.