Noreg må rapportere forbruk av antibiotika til dyr til Det europeiske legemiddelbyrået (EMA). Dataa kjem frå Mattilsynets VetReg. Her rapporterer veterinærar forbruk av medisinar, medan apotek rapporterer utleveringar.
Veterinærinstituttet (VI) har vurdert om dataa for 2024 oppfyller EMA sine krav om at informasjon for storfe, gris, kylling og kalkun skal vere nøyaktig, komplett og konsistent. VI har òg vurdert effekten av Mattilsynets arbeid for å betre datakvaliteten, og peika på område som framleis må forbetrast.
Data frå apotek i 2024 var meir komplette enn i 2023 – 89 prosent mot 67 prosent. Dette kjem truleg av Mattilsynets arbeid med å følgje opp dataleverandørane for å auke rapporteringa. Veterinærane har òg blitt betre til å rapportere bruk av intramammarier (legemiddel brukte ved jurbetennelse hos ku), som har vore eit satsingsområde.
Den største feilkjelda i 2024-dataa var rapportering av kor mange dyr som er behandla. I omtrent 30 prosent av rapportane, både frå veterinærar og apotek, mangla denne informasjonen. Dette gjer det vanskelegare å vurdere om rapporteringa av kor mykje medisin som faktisk er brukt, er rett, og påverkar dermed rapporteringa til EMA.
Den totale komplettheten i data som blir sende til EMA gjekk ned frå 85 prosent i 2023 til 78 prosent i 2024. Dette kan komme av feil i 2023-dataa, til dømes nokre få rapportar med svært høgt forbruk som ikkje blei oppdaga i kvalitetskontrollen. Metoden for kvalitetsvurdering bør derfor forbetrast. Det var òg ein tydeleg nedgang (20 prosent) i rapportar om antibiotikabruk til gris frå 2023 til 2024. Det er førebels uklart om dette kjem av reell reduksjon i forbruk, dårlegare datakvalitet, eller begge deler.