Kurs i veterinært beredskapsarbeid
Veterinærinstituttet inviterer til beredskapskurs våren 2026. Kurset er retta mot veterinærar i dyrehelseforvalting og i produksjonsdyrpraksis, og er lagt opp slik at både erfarne og nyutdanna veterinærar vil kunna ha nytte av kurset.
Kurset er todelt, med ein webinardel 8. april og fysisk kurs lunsj-til-lunsj 14.-15. april hos Veterinærinstituttet Tromsø.
Målet med kurset er å trena på korleis ein som veterinær førebur seg og handlar i ein beredskapssituasjon, og å hjelpa deltakarane til å bli trygge i beredskapsrolla.
Webinardelen gir ei innføring i beredskapsarbeid og rollefordeling ved utbrot av listeførte dyresjukdomar, samt eit oversyn over aktuelle sjukdomar på frammarsj og diagnostiske kriterier. Under det påfølgjande praktiske treningsopplegget i Tromsø vil deltakarane få øva praktisk på feltobduksjon og prøvetaking.
Ein feltobduksjon kan styrka eller svekkja mistanken om alvorleg smittsam dyresjukdom, avdekka dødsårsak, eller gi informasjon som er viktig for førebygging og behandling. Me vil derfor bruka tid på å gå gjennom vurdering av organfunn ved obduksjon, samt målretta prøveuttak og innsending. Deltakarane vil også få tørrtrena på avliving av produksjonsdyr. På den måten får ein, innanfor trygge rammar og god fagleg rettleiing, trena seg på fleire ulike prosedyrar som er sentrale ved eit alvorleg sjukdomsutbrot.
Etter gjennomført kursopplegg er målet at deltakarane har tileigna seg praktiske og teoretiske kunnskapar og evner for førebygging og handtering av smittsame dyresjukdomar, er blitt tryggare og meir rollemedvitne.
Inkludert i kurset er lunsj og kaffi under den fysiske delen av kurset, samt undervising og forbruksmateriell. Det er ikkje deltakaravgift på kurset, men reisekostnader og hotell må dekkjast av deltakar/arbeidsgjevar.
Påmelding gjeld begge kursdagane, det vil ikkje vera mogleg å melda seg på berre den eine dagen.
Frist for påmelding: 15. mars 2026!
NB! Ver tidleg ute! Det er plass til inntil 20 deltakarar på fysisk kurs, og dermed vil påmeldinga bli stengt etter dei 20 første påmelde, eller når påmeldingsfristen er passert.
→ Meld deg på kurset her.
Program 8. april: Webinar - digitalt introduksjonskurs på Teams
| Tidspunkt | Tema | Ansvarleg |
| 10.00 - 10.10 | Velkommen og info | Veterinærinstituttet |
| 10.10 -10.50 | Generelt om beredskap i Noreg | Veterinærinstituttet |
| 10:50- 11:10 | Kva kan VI bidra med i ein beredskapssituasjon | Veterinærinstituttet, Mattilsynet |
| 11:10-11:30 | Beredskap på garden - først på staden | Mattilsynet |
| 11:30-12:00 | Lunsj | |
| 12.00 - 12:20 | Beredskapsarbeid i næringa | Animalia |
| 12.20 - 12:50 | Samarbeid om beredskap | VI - Mattilsynet - Animalia |
| 12:50-13:00 | Diskusjon, spørsmål | |
| 13:00-13:15 | Kaffipause | |
| 13:15 - 13:35 | Sjukdomar på frammarsj - gris | VI fagansvarleg (Carl Andreas Grøntvedt) |
| 13:35-13:55 | Sjukdomar på frammarsj - småfe | VI fagansvarleg (Annette Kampen) |
| 13:55-14:15 | Sjukdomar på frammarsj - storfe | VI fagansvarleg (Siv Meling) |
| 14:15-14:35 | Sjukdomar på frammarsj - fjørfe | VI fagansvarleg (Silje Granstad) |
| 14:35-14:55 | Sjukdomar på frammarsj - rein | VI fagansvarleg (Torill Mørk) |
| 14:55-15:05 | Spørsmål | |
| 15:05 | Avslutning | Veterinærinstituttet |
Førebels program 14.-15. april: Fysisk kurs i Tromsø
| DAG 1 | Program |
| 12:00-12:10 | Velkomen |
| 12:10-12:25 | VI Tromsø og Reinhelsetjenesten |
12:25-13:05
| MKS scenario (Fylkes-ROS) |
| 13:05-13:20 | Pause |
| 13:20-13:50 | Obduksjon - førebuing og innslusing |
| 13:50-15:00 | Obduksjon - avliving |
| 15:00-15:10 | Pause |
| 15:10-15:45 | Avslutning og diskusjon |
| DAG 2 | Program |
| 09:00-09:10 | Velkommen |
| 09:10-09:40 | Teori om feltobduksjon |
| 09:40-09:50 | Pause |
| 09:50-11:40 | Obduksjon - praktisk trening i feltobduksjon |
| 11:40-12:15 | Lunsj |
| 12:15-13:00 | Handsaming av prøvar |
| 13:00-13:15 | Avslutning, spørsmål og hjemreise |
- Hvor
- Webinar (8. april) og Veterinærinstituttet i Tromsø
- Når
- 14. april 2026 kl. 12.00 - 15. april 2026 kl. 13.15