Vassflaggermusa blei funne svak og i live, men døydde etter nokre dagar i pleie. Hjernevev frå dyret blei rutinemessig undersøkt for flaggermusrabiesvirus, og det vart påvist European Bat Lyssavirus 2.
Om viruset
Flaggermusrabies er ein virussjukdom i det sentrale nervesystemet hjå flaggermus som skuldast lyssavirus. Lite er kjent om dei smitta flaggermusa blir sjuke av viruset og kva symptom dei då har. Flaggermusrabies i Europa er hovudsakleg årsaka av European Bat Lyssavirus (EBLV), der det finnest to ulike genotypar av lyssavirus: EBLV-1 og EBLV-2. Ulike flaggermusartar fungerer som eit reservoar for dei to virustypane. Førekomst av EBLV hjå flaggermus i Noreg er ikkje kartlagt.
Av flaggermus som er funne smitta med EBLV er meir enn 95% av arten sørflaggermus (Eptesicus serotinus) som har vore smitta med EBLV-1. Meir skjeldan har ein påvist EBLV-2 og då hovudsakleg hjå vassflaggermus (Myotis daubentonii) og andre Myotis-artar.
EBLV-2 er påvist hjå flaggermus hovudsakleg i Storbritannia og Nederland, men er også påvist i Finland, Tyskland og Sveits.
Alle dei europeiske flaggermusartane er insektetarar. Vassflaggermus er vanleg i Noreg og finnest nordover til Trøndelag. Den lever i skog, helst lauvskog i nærleiken av vatn. Ofte jaktar dei like over vassoverflata. Ynglekoloniar finnest i ulike habitat som innhola trær, bergsprekkar, steinbruer o.l. Dei blir skjeldan påvist i bygningar. Dei går i dvale om vinteren.
Lav risiko for menneske og andre dyr
Det er svært liten risiko for å bli smitta av flaggermusrabiesvirus. Smitten blir overført via spytt ved bitt eller ved rifter i huda samt dersom eksisterande hudsår får spytt på seg. Det er først og fremst forskarar og amatørzoologar som jamt handterer levande flaggermus som står i fare for å kunne bli smitta. Det er difor rådd til at desse vaksinerer seg mot rabies.
I Europa er det berre fire kjende tilfelle der menneske har døydd av flaggermusrabies. Berre to av desse var årsaka av EBLV-2. Det vert òg rekna som liten risiko for andre pattedyr.
Veterinærinstituttet er nasjonalt referanselaboratorium for rabies. Veterinærinstituttet har nytta molekylærbiologiske metodar for å påvise viruset og samanlikna viruset med andre EBLV-2 virus. Mattilsynet er ansvarleg for å oppfølging av påvisingar eller utbrot av dyresjukdommar i felten, sjå mattilsynet.no. Flaggermusrabies vert handtert som ein gruppe A-sjukdom, jamfør Matlova.
Fakta om flaggermusrabies
Fakta om rabies
Meldingar frå andre:
Les nettmelding frå Mattilsynet
Les nettmelding frå Folkehelseinstituttet
Les nettmelding frå Miljødirektoratet
Om flaggermus fra Norsk zoologisk forening