Go miessi massá eatnis 

Don sáhtát geahččalit addit oastto mielkebuhtadusa miessái. Boazodearvvašvuođabálvalus lea ožžon oainnuid movt dan sáhttá dahkat, muhto gávdnojit sihkkarit eará vásáhusat ja čovdosat. Dieđihehket áinnas midjiide maŋás iežadet vásáhusaid birra go lehpet biebman misiid doahtuin juogo kommentárasajis dahje njuolga diehtun. 

Doahttobiebman mielkebuhtadusain 

Vuogis man birra Boazodearvvašvuođabálvalus lea gullan adnojuvvo lábbáid mielkebuhtadus. Mielkebuhtadus ráhkadat (geahča ráhkadanneavvaga sierra govas) ja sáhtát geavahit moadde beaivvi nu guhká go anát dan galmmihanskábes lihti siste mas lea lohkki ja fierut dan juohke háve ovdal go attát. 

Go biebmat doahtuin de lea dehálaš ahte ligget mielkeseaguhus rumaštemperatuvrii, muđui sáhttá leat váttis oažžut miesi njammat. Ligget sáhtát dainna lágiin ahte biját doahtu mas mielkeseaguhus lea loika čáhcái, seamma láhkai go dahkkojuvvo njuorat mánnái. Muhtun háviid sáhttá leat ávkkálaš geahččalit iešguđetlágan doahttogežiid jus miessi ii njama. 

Atte sullii 15-30 mL álggos ja lasit meriid veahá dađistaga. Sáhttá leat erohus miesis miessái man olu dat dárbbašit. Fertet njamahit doahtuin unnimusat 5 geardde jándoris dássážii go dat leat unnimusat 1,5 mánnosaččat. Dan maŋŋil sáhtát hihtásit unnidit man gallii biepmat jándoris. Atte šibitfuođđara, roavvafuođđara/guohtuma ja jeahkála álggu rájes. 

Mielkebuhtadus 

  • 315 grámma lábbáid mielkebuhtadus 
  • 1,65 L čáhci 
  • 1 pk (0,33 L) lákca

Doahttonjamaheapmi suvramilkkiin 

Hárjet dađistaga suvrramielkái (geahča gova) suoidnemánus. Das lea eará máhku ja dat fertejit hárjánit dasa. 

Suvramielkit

  • 1330 grámma mielkebuhtadus lábbáide 
  • 7 L čáhci (galbma) 
  • 2,5 L suvramielki 
  • Divtte čuožžut 2 jándora. Fiero moatte háve beaivvis. 

Ráinnasvuohta lea dehálaš 

Lea dehálaš doallat sihke mielkeseaguhusa, suvrramielkki ja biergasiid hirbmat ráinnasin. Doahtuid ja doahttogežiid fertet bassat bures juohke háve go leat biebman. Mielkeseaguhus ferte čuožžut galmmihanskábes lohkiin ja go mielkeseaguhus lea liggejuvvon okte de it ábut dan bidjat ruovttoluotta galmmihanskábii. 

Njárbesčoavji? 

Bibmojuvvon misiin sáhttá jođánit šaddat njárbesčoavji. Jus miesis šaddá njárbesčoavji de fertet jođánit dahkat juoidá, dat goiket johtilit! Don sáhtát dalle geahččalit unnidit biebmama milkkiin ja geahččalit addit Felleskjøpets Pluss Saltbalanse Drøv moadde beaivvi.