Boazodearvvašvuođabálvalus álggahuvvon

Boazodearvvašvuođabálvalus leat dál álggahuvvon!

Boazodoallošiehtadusas 2021/2022 sohppojuvvui álggahit 3-jagáš pilohttaprošeavtta mii galgá nannet máhtu lojes bohccuid dearvvašvuođa ja buorredili birra. Boazodearvvašvuođabálvalus bohccuide lea leamaš geardduhuvvon fáddá. 2020:su čađahuvvui guorahallan lea go dárbu dakkár bálvalussii. Ráhkaduvvui maiddái mo hápmi galgá leat. Eanandoallodirektoráhtas lei ovddasvástádus raporttas maid oaččui bargun Eanandoallo- ja biebmodepartemeanttas (LMD) ja Norgga Boazosápmelaččaid Riikkasearvvis(NRL) (Rapport nr. 42/2020). Prošeakta organiserejuvvo álggos pilohttaprošeaktan mii bistá golbma jagi ja Veterinearainstituhtta jođiha dan. Čállingoddi lea Eanandoallodirektoráhtta.

Lea ožžon mandáhta

Ulbmil lea earret eará nannet boazodoalloealáhusa ja šibitdoaktáriid máhtu bohccuid dearvvašvuođa ja buorredili birra. Pilohttarošeakta galgá buoridit máhttovuođu, láhčit dávdadiagnostihka buot boazodoalloguovlluin ja čielggadit vejolašvuođa čohkket dearvvašvuođadieđuid boahttevuođas. Lea maiddái ulbmil ovddidit šibitdoaktáriid máhtu boazodoalu ja badjesámi kultuvrra birra.

– Boazodearvvašvuođabálvalus galgá leat fálaldat ealáhussii dustet boahtte áigi dearvvašvuođahástalusaid, muitala Torill Mørk, Veterinearainstituhta šibitdoavttir ja dutki.

BBD (LMD) ja NBR (NRL) leaba addán Veterinearainstituhttii viiddis mandáhta ovdánahttit Boazodearvvašvuođabálvalusa. Dat fátmmasta earret eará boazodolliide ja šibitdoaktáriidda heivehuvvon kurssaid plánema ja čađaheami, máhttoovdánahttima ja boazodearvvašvuođadieđuid fágalaš diehtojuohkima ja vuogádahttima. Boazodearvvašvuođabálvalusa galgá maiddái neavvut ja veahkehit boazodoalloealáhussii fáhkkatlaš dilis. Pilohttaprošeavtta čađaha Veterinearainstituhta ovttadat Romssas

Buorre ovttasbargu

Jus prošeakta galgá lihkostuvvat de ferte leat buorre oktavuohta boazodoalloealáhusain ja šibitdoaktáriiguin. Lea maiddái mearrideaddjin ahte dárbbut kártejuvvojit. Ásahuvvo maiddái ovttasbargu dearvvašvuođabálvalusaiguin bohccuid várás Ruoŧas ja Suomas.

Loga eambbo Boazodearvvašvuođabálvalusa birra dás: Boazodearvvašvuođabálvalusa birra.– Mii illudit buori ovttasbargui boazodearvvašvuođa ja bohccuid buorredili hárrái